Cwrdd â’r Tîm – Ant Tomlinson

Wedi’i ysgrifennu gan John Roberts

Mi wnes i gyfarfod Ant am y tro cyntaf pan oeddwn i’m gwneud llawer o waith ar raglen Natur er budd Iechyd yn Nyffryn Dyfrdwy a’r cyffiniau. Roedd gen i ddiddordeb penodol mewn cyfarfod ag o eto gan ei fod yn rheoli mynediad cyhoeddus yn ein Tirwedd Cenedlaethol yn ei swydd ar hyn o bryd, sy’n rhywbeth mae gen i ddiddordeb ynddo, a dyna’r rheswm y gwnes i wirfoddoli gyda’r AHNE yn y lle cyntaf. Fe wnaethom gyfarfod yn Loggerheads a dyma sut aeth ein sgwrs:-

Dweda sut cychwynnodd pethau

Bachgen lleol ydw i ac rydw i wedi byw a gweithio yn yr ardal erioed. Cefais fy magu ac mi es i’r ysgol ym Mae Colwyn – mae gan fy nheulu hen gysylltiadau â ffermio ar y Gogarth! Pan oeddwn i yn fy arddegau, fe symudom ni i ardal Llangollen lle’r ydw i’n dal i fyw gyda fy mhartner, Liz. Mi feddyliais am aros mewn addysg ond, ar y pryd, roeddwn i’n awyddus iawn i brofi byd gwaith a dyna’r llwybr ddewisais i.

Beth ddigwyddodd nesaf?

Ar ôl cyfnod o symud rhwng gwahanol bethau, roeddwn i’n ffodus o gyfarfod â rhywun oedd â chysylltiad proffesiynol â’r diwydiant adeiladu ac, yn benodol, defnyddio concrid ar ei holl wahanol ffurfiau. Mewn byr eiriau, yn y pen draw, mi ddois i’n arbenigwr ar ddadansoddi’r pridd ac amodau’r ddaear ar safleoedd lle byddai prosiectau adeiladu’n cael eu gwneud. Er fy mod i’n dal i fyw’n lleol, roeddwn i’n teithio llawer ac fe wnes i wir fwynhau’r amrywiaeth oedd yn y gwaith ac asesu’r concrid a’r deunyddiau cywir i allu datblygu’n ddiogel.

Nid y cefndir arferol i weithio ym maes cadwraeth! 

Na, ond nid dyna’r cyfan! Roedd gen i bob amser ddiddordeb mawr mewn cerbydau a’u cynnal a’u cadw. Fe es i ymlaen i redeg fy musnes cludiant fy hun yn danfon concrid a deunyddiau eraill. Roedd hwn yn brofiad arbennig hefyd ac roeddwn i’n mwynhau’r cyfuniad o weithio ar fy mhen fy hun yn aml a chyfarfod â chleientiaid hefyd, gan ddatblygu’r sgiliau trin pobl sydd o gymorth mawr i mi yn y swydd hon.

Oedd natur a’r amgylchedd bob amser yn bwysig i ti?

Oedd – ac fel y byddai rhywun yn dychmygu, roedd fy ngwaith yn gwneud i mi sylweddoli mor bwysig oedd hi i ni sicrhau bod ein treftadaeth naturiol yn cael ei gwarchod. Fe ddois i at bwynt lle’r oeddwn i eisiau gwneud rhywbeth gwahanol mewn bywyd ym maes yr amgylchedd a natur. Roeddwn i’n ddigon ffodus o gael cyfle i weithio fel Ceidwad gyda thîm yr AHNE yn Llangollen ac mae’n gam nad ydw i erioed wedi’i ddifaru.

Beth am y fenter Natur er budd Iechyd?

Ar ôl i mi gychwyn fel Ceidwad, cefais gyfle i gyfuno’r gwaith hwnnw â chefnogi Natur er budd Iechyd, gyda fy nghydweithiwr, Becky. Ein nod oedd rhoi cyfle i bobl yn y gymuned leol oedd â phroblemau iechyd, ond heb y fantais o fod yn gyfarwydd â’r awyr agored, i wella eu hiechyd a’u lles gyda gweithgareddau natur. Mae wedi bod yn llwyddiant ysgubol ac yn rhywbeth sydd wedi rhoi boddhad mawr i mi hefyd. Rydw i wedi gweld manteision hyn i unigolion gyda fy llygaid fy hun ac mae heb os yn rhywbeth mae angen parhau ag o a’i ehangu.

Beth am dy swydd bresennol?

Eto, rydw i wedi mwynhau gwneud hon yn fawr iawn. Fel beiciwr mynydd brwd, rydw i bob amser wedi bod yn ymwybodol bod ein rhwydwaith o lwybrau meirch a llwybrau cerdded angen gofal a sylw’n gyson. Mae mynediad i gefn gwlad yn beth gwerthfawr inni i gyd a braint yw gweithio gyda gweithwyr hwaliau tramwy eraill yn ein hawdurdodau lleol i helpu i gadw ein llwybrau mewn cyflwr da. Mae’n dasg enfawr, ac eithaf prin yw’r adnoddau dynol ac ariannol, ond mae’n hollbwysig ein bod ni’n gwneud popeth o fewn ein gallu i gadw’r rhwydwaith ar agor ac ar gael. Mae hyn yn mynd yn ôl at beth ddwedais i ynghynt am fanteision y Rhaglen Natur er budd Iechyd – mae digon o gyfleoedd i fynd i gefn gwlad yn beth da i bob un ohonom ac mae’n rhaid cynnal a gwella hynny. Mae ein gwaith gyda llwybrau cenedlaethol a lleol, yn ogystal â’r Milltiroedd Cymunedol, yn cyfrannu’n fawr at hyn.

Beth sydd nesaf i ti? 

Fe gymerais i’r swydd mynediad i reoli a chyflawni prosiectau gwella mynediad ar draws Sir Ddinbych, yn ogystal â phrosiectau hamdden cynaliadwy yn y Tirwedd Cenedlaethol. Roedd hyn hefyd yn cynnwys ysgwyddo rhywfaint o gyfrifoldebau Hannah tra oedd hi ar famolaeth. Rwyf bellach wedi ymrwymo’n llawn i’r gwaith hwn a byddwn wrth fy modd yn parhau i wneud fy nghyfraniad yn y dyfodol. Mae ansicrwydd faint o gyllid fydd ar gael ar gyfer prosiectau gwella hawliau tramwy ar hyn o bryd. Gobeithio y bydd Llywodraeth Cymru’n gweld y gwaith cadarnhaol sy’n cael ei wneud ar hyd a lled Cymru drwy’r Grant Gwella Mynediad ac yn parhau i’w ariannu er mwyn i ni allu parhau i gyflawni’r manteision ar lawr gwlad.

Mae newidiadau ar y gorwel o bosib’ hefyd – pa mor dda fyddai gweld y Berwyn yn hawlio ei le yn rhan o’n tirwedd ddynodedig? Rydw i’n siŵr y bydd cyfleoedd newydd eraill hefyd. Rydw i’n credu y gall fy sgiliau trin pobl i fod yn ddefnyddiol iawn. Mae fy ngyrfa mewn busnes wedi rhoi hyder i mi ymgysylltu â phobl mewn ffordd adeiladol – mae hynny bob tro’n ased pan mae hawliau tramwy’n peri pryder!

A phan nad wyt ti yn y gwaith?

Mae Liz a minnau’n byw yng nghefn gwlad ger Llangollen a’r ardd yw’r flaenoriaeth fwyaf bob tro. Rydw i’n dal i dreulio rhywfaint o amser yn mocha gyda cherbydau hefyd! Mae’r ddau fab wedi tyfu i fyny – un yn byw yn agos a’r llall draw yng Nghaerloyw – ac rydyn ni’n mwynhau mynd am dro ar ein beics.

Y cwestiwn olaf arferol – beth yw dy hoff le yn ein Tirwedd Cenedlaethol?

Dw i wrth fy modd efo Bryn Alun, ond os oes rhaid dewis, byddwn yn mynd am Fwlch y Groes yn edrych dros Ddyffryn Dyfrdwy. Does unlle gwell am eiliad o dawelwch!